Mbao Yavuruga Sherehe Za Yanga SC Mwaka Mpya

Wachezaji wa timu ya Yanga.

KILICHOTOKEA jana kwenye Uwanja wa CCM Kirumba ilikuwa ni noma sana. Yanga walichezewa mpira kama vile siyo mabingwa watetezi na wakala bao 2-0 za halali kabisa kutoka kwa Mbao FC ya jijini hapa, timu ambayo ilipanda daraja misimu miwili iliyopita kwa miujiza.

Mbao walicheza kandanda safi jana na kufanikiwa kuwaumbua Yanga kwenye mchezo mkali wa Ligi Kuu Bara, hivyo Jangwani wakaukaribisha mwaka mpya kwa majonzi. Mbao wangeweza kupata bao la tatu baada ya Abdallah Shaibu ‘Ninja’ kutaka kujifunga. Hii inamaanisha kwamba Yanga haijawahi kupata ushindi dhidi ya Mbao kwenye Uwanja wa CCM Kirumba.

Kikosi cha timu ya Mbao FC.

Msimu uliopita kwenye ligi, Yanga walifungwa bao 1-0, walipokutana tena uwanjani hapo kwenye nusu fainali ya Kombe la FA, Yanga ilichapwa 1-0 tena, kabla ya jana kuchapwa 2-0. Yanga wamepoteza nafasi ya kuikaribia Simba kileleni, kwani imebaki na pointi 21 katika nafasi ya nne, wakati vinara Simba wana pointi 26. Mbao wenyewe wamepanda hadi nafasi ya saba wakiwa na pointi 14.

Baada ya mechi za kesho (tazama ratiba ukurasa wa nne), ligi itasimama kwa wiki mbili kupisha michuano ya Kombe la Mapinduzi. Katika mchezo wa jana, mabao ya Mbao yalifungwa na Habib Haji dakika ya 53 na 68. Sasa Haji amefikisha mabao saba ambapo ni bao moja tu nyuma ya kinara wa mabao, Emmanuel Okwi mwenye nane. Katika mchezo huo, David Mwasa alipewa kadi nyekundu (za njano mbili) dakika ya 76 kutokana na kumchezea vibaya Amissi Tambwe wa Yanga.

Katika mchezo mwingine wa ligi jana, Singida United ikiwa ugenini ilishinda 3-0 dhidi ya Njombe Mji kwenye Uwanja wa Sabasaba mkoani Njombe. Mabao ya Singida yalifungwa na Elinyaieshi Simbi dakika ya 18, Awadhi Salim dakika 43 na Shafik Batambuzi dakika ya 66. Singida imepanda hadi nafasi ya tatu ikiwa na pointi 23.
Stori: Leah Marco, Mwanza