Lowassa, Sumaye wauponda utafiti wa Twaweza majibu Oktoba 25

Mgombea urais aliyesimamishwa na Umoja wa Katiba ya Wananchi (Ukawa) kupitia Chadema, Edward Lowassa, ameponda matokeo ya utafiti uliofanywa naTwaweza, akisema taarifa

hiyo ni uwongo mtupu.

 

Alisema hayo wakati akizungumza kwenye mkutano mkubwa wa kampeni katika Jimbo la Masasi jana na kuwaomba wananchi wampigie kura.

 

“Mmenifurahisha sana kwa mwitikio wenu huu, mmekuja kwa wingi na mahudhurio yenu yamekuwa mazuri, asanteni sana kwa mahaba yenu. Sikujua Masasi ina watu wengi namna hii, nimekuja kuwasalimia na kuwaombeni kura…hii ni sunami,” alisema Lowassa na kuongeza:

 

“Kama walivyoeleza vizuri sana awali John Mrema (Mkurugenzi wa Uchaguzi na Bunge wa  Chadema) na Waziri Mkuu Mstaafu Frederick Sumaye kuhusu ripoti ya Twaweza iliyotangazwa leo (jana), ripoti hiyo ni uongo mtupu. Kuhudhuria kwenu kwa wingi namba hii kuna dhihirisha kuwa nitashinda kwa kura nyingi Oktoba 25.”

 

Aliwaomba wananchi wampigie kura nyingi zaidi ya milioni 16. “Mnipe kura nyingi ili hata hao jamaa wakiiba zibakie nyingi. Angalieni hao jamaa ni wezi sana wa kura,  nataka kura nyingi siyo mchezo,” alisema.

 

AELEZA SABABU KUUTAKA URAIS

Lowassa alisema anautaka urais kuwaili aweze kupambana na umaskini uliokithiri nchini.

 

 “Nautaka urais ili niondoe umaskini, kwa mfano, mwenye kula kuku mmoja ale kuku wawili, mwenye bodaboda moja au gari moja basi apate gari mbili, na mwenye mke mmoja basi aweze kuoa wake wawili kama dini yake inaruhusu na mkewe akiridhia hilo,” alisema.

 

 Alitaja sababu nyingine ni kuinua elimu ili iwe bora na kuifanya kuwa bure kuanzia chekechekea hadi chuo kikuu.

Lowassa pia alisema akiwa Rais atainua zao la korosho na kupiga marufuku utaratibu wa stakabadhi ghalani na kuwaruhusu wakulima kuuza mazao yao popote ndani na nje ya nchi.

 

MGOGORO WA UBUNGE MASASI

Katika mkutano huo, Lowassa alifanya kazi ya ziada kuamua mgogoro wa nani agombee ubunge katika jimbo hilo baada ya kuwapo kwa vuta ni kuvute kati ya Ismail Issa Makombe (CUF), maarufu  Kundambanda na Mwenyekiti wa NLD, Dk. Emmanuel Makaidi.

 

Awali, baada ya kupima hali ya hewa ya umati uliojitokeza wakimtaka Kundambanda agombee, Lowassa alisimama jukwaani na kumuomba Dk. Makaidi kumpisha kijana huyo kugombea nafasi hiyo.

 

Hata hivyo, Dk. Makaidi hakuridhia ushauri huo na busara iliyotumika ni kuwaruhusu wagombea wote wawili kugombea.

 

MREMA

Mapema akizungumzia kuhusu utafiti wa Twaweza, Mrema alisema wana uhakika mgombea wao atapata ushindi mnono.

 

“Wapo watu Dar es Salaam wanakaa ofisini na kutunga matokeo ya utafiti kuwa Dk. John Magufuli atapata ushindi kwa asilimia 65 dhidi ya Lowassa. utafiti huo wa Twaweza haukuzingatia maoni ya watu kutoka majimbo kama ya Masasi na Lowassa atashinda mapema asubuhi,” alisema.

 

SUMAYE

Kwa upande wake, Sumaye aliponda utafiti huo, akisema hauna ukweli wowote.

Aliwataka wananchi hao kupiga kura kwa wingi bila kuwa na hofu kwamba nchi itaingia kwenye vita kwa sababu wananchi wameamua kuupigia kura upinzani.

 

“Sisi tumetoka huko (CCM) na kuja huku upinzani kuonyesha upinzani una watu wenye ujuzi kuongoza,” alisema na kuongeza:

 

 “CCM iliwaahidi maisha bora kwa kila Mtanzania, sasa wanayapata hayo maisha?” aliuliza na kujibiwa ‘hapana’.

Alimshambulia Katibu wa Itikadi na Uenezi wa CCM, Nape Nnauye, kuwa amemtisha kwa kukiandama chama na yeye hataki siasa za kutishana.

 

“Mimi sio mtoto mdogo, hatutaki kutishana, tunauliza maswali kwa niaba ya wananchi kuhusu biashara ya meno ya tembo, usafirishaji wa twiga kwenye ndege kwani sisi tulikuwepo?.  Sasa Warioba (Waziri Mkuu Mstaafu, Jaji Joseph Warioba na Magufuli wanasema tumechanganyikiwa,”.

 

“Hakuna aliyechanganyikiwa, tunauliza hayo watupe majibu, sasa tukifanya hivyo tunaambiwa tumechanganyikiwa.”

CHANZO: NIPASHE