Liverpool Wapoteza Kwa Uchungu Anfield, Man City Wageuza Meza Dakika za Mwisho

 

Liverpool wameonja machungu ya kupoteza nyumbani baada ya kukubali kichapo cha mabao 2-1 dhidi ya Manchester City katika mchezo mkali wa Ligi Kuu England uliochezwa kwenye dimba la Anfield, huku mabao ya dakika za lala salama yakizima shangwe za mashabiki wa The Reds.

Katika mchezo huo uliokuwa na ushindani mkubwa kuanzia mwanzo hadi mwisho, Liverpool walionekana kuwa karibu kuondoka na pointi tatu baada ya Dominik Szoboszlai kuwafungia bao la kwanza dakika ya 74 kwa shuti kali lililomshinda mlinda mlango wa Man City, Ederson. Bao hilo liliamsha matumaini makubwa kwa mashabiki wa Liverpool waliokuwa wamejaa Anfield.

Hata hivyo, Manchester City hawakukata tamaa. Kocha Pep Guardiola alifanya mabadiliko ya kimkakati yaliyoipa timu yake nguvu mpya, jambo lililoanza kuzaa matunda dakika ya 84 pale Bernardo Silva alipofunga bao la kusawazisha baada ya mpira wa rebound kufuatia shinikizo kubwa langoni mwa Liverpool.

Kadri dakika zilivyozidi kuyoyoma, mchezo ulizidi kuwa wa presha, huku Man City wakionekana kutawala umiliki wa mpira na kusukuma mashambulizi. Jitihada zao zililipwa dakika ya 90+3 baada ya Erling Haaland kufunga bao la ushindi kwa mkwaju wa penalti, kufuatia faulo iliyochezwa ndani ya eneo la hatari. Bao hilo lilizima kabisa matumaini ya Liverpool na kuacha Anfield kimya.

Kwa ushindi huo, Manchester City wamefikisha alama 50 baada ya mechi 25, wakisogea mpaka alama sita nyuma ya vinara wa ligi, Arsenal, na kuendelea kushika nafasi ya pili kwenye msimamo wa Ligi Kuu England. Ushindi huo unaongeza presha kwa Arsenal katika mbio za ubingwa, huku City wakionyesha kuwa bado wako kwenye mbio hizo kikamilifu.

Kwa upande wa Liverpool, kipigo hicho kimewaacha wakiwa nafasi ya sita kwenye msimamo wa ligi wakiwa na alama 39 baada ya mechi 25, hali inayozidi kufanya vita ya kuwania nafasi za juu na tiketi ya michuano ya Ulaya kuwa ngumu zaidi.

Matokeo ya mchezo:
FT: Liverpool 1-2 Manchester City
⚽ 74’ Szoboszlai
⚽ 84’ Bernardo Silva
⚽ 90+3’ Erling Haaland (Penalti)