Rasmi TFF Yatangaza Kuipoka Simba Pointi 3, Yazirudisha Kwa Kagera Sugar

 

Kamati ya Katiba, Sheria na Hadhi za Wachezaji ya Shirikisho la Mpira wa Miguu Tanzania (TFF) iliyokutana leo tarehe 23 Aprili 2017 imekamilisha mapitio ya maamuzi ya Kamati ya Usimamizi na Uendeshaji wa Ligi (Kamati ya Masaa 72). Baaada ya Mapitio hayo Kamati imeamua yafuatayo:
I. Kamati imebatilisha maamuzi yaliyotolewa na Kamati ya Uendeshaji wa Usimamizi wa Ligi kwa sababu zifuatazo:

 
1. Malalamiko ya Klabu ya Simba kutowasilishwa kwa wakati kwa mujibu wa kanuni 20(1) ya Kanuni za Ligi Kuu toleo la 2016 inayotaka malalamiko yoyote yanayohusiana na mchezo yawasilishwe kwa maandishi Bodi ya Ligi Kuu sio zaidi ya masaa 72 baada ya mchezo kumalizika.

2. Malalamiko hayo hayakulipiwa ada kwa mujibu wa kanuni 20(4) kinachosema ada ya malalamiko ni Shs. 300,000/= (Shilingi laki tatu). Malalamiko yatakayowasilishwa bila kulipiwa ada au baada ya muda uliowekwa hayatasikilizwa.

 
3. Kikao cha Kamati ya Usimamizi na Uendeshaji wa ligi kilikosa uhalali baada ya kuwashirikisha wajumbe waalikwa ambao sio sehemu ya kamati hiyo. 

 
Hivyo, matokeo ya mchezo wa Kagera Sugar dhidi ya Simba Sports Club yanabakia kama yalivyokuwa awali (2-1). 

Vilevile Kamati ya Katiba, Sheria na Hadhi za Wachezaji imemwagiza Katibu Mkuu wa TFF kuwapeleka katika Kamati za kinidhamu na Maadili baadhi ya Watendaji wa Bodi ya Ligi kwa kutowajibika katika nafasi zao na kuipotosha Kamati ya Usimamizi na Uendeshaji wa Ligi.
IMETOLEWA NA SHIRIKISHO LA MPIRA WA MIGUU TANZANIA (TFF).