Rais wa Shirikisho la Soka Saudi Arabia Ajiuzulu Baada ya Timu Kutolewa Mapema Kombe la Dunia

 

RIYADH – Yasser Al-Misehal amejiuzulu nafasi yake ya Rais wa Bodi ya Saudi Arabian Football Federation (SAFF), akichukua jukumu la kutolewa mapema kwa timu ya taifa ya Saudi Arabia katika Kombe la Dunia la FIFA 2026.

Kupitia taarifa aliyochapisha kwenye mtandao wa X, Al-Misehal alisema kushindwa kwa Green Falcons kuvuka hatua ya makundi hakukuendana na matarajio ya soka la Saudi Arabia na mashabiki wake, hivyo ameona ni vyema kuwajibika kwa kuachia nafasi hiyo baada ya kuhudumu kwa miaka saba.

Alisema kuondoka kwake kutafungua ukurasa mpya wa maendeleo ya soka nchini humo, huku akithibitisha kuwa taratibu za uchaguzi wa viongozi wapya wa shirikisho zitaanza kwa mujibu wa kanuni za SAFF.

Al-Misehal pia alimshukuru Salman bin Abdulaziz Al Saud, Mohammed bin Salman pamoja na Waziri wa Michezo Abdulaziz bin Turki Al Faisal kwa msaada wao kwa maendeleo ya soka la Saudi Arabia.

Saudi Arabia ilimaliza kampeni yake ya Kombe la Dunia bila ushindi wowote. Timu hiyo ilitoka sare ya 0-0 dhidi ya Cabo Verde katika mchezo wa mwisho wa hatua ya makundi, baada ya kutoka sare ya 1-1 na Uruguay na kupokea kipigo kizito cha mabao 4-0 kutoka kwa Hispania.

Kutolewa huko kumekosolewa vikali na mashabiki, wachezaji wa zamani na wachambuzi wa soka, ambao wametaka mageuzi makubwa ndani ya shirikisho hilo kuelekea michuano ya AFC Asian Cup ambayo Saudi Arabia itaandaa, pamoja na maandalizi ya kuandaa 2034 FIFA World Cup.

Licha ya kujiuzulu, Al-Misehal amesema ataendelea kuitumikia michezo ya Saudi Arabia katika nafasi nyingine na kuunga mkono juhudi za kuinua kiwango cha soka nchini humo.