Sundowns Yalazimishwa Sare na Lupopo Katika CAF Champions League

 

Mamelodi Sundowns (Masandawana) wamelazimika kugawana pointi baada ya kutoka sare ya bao 1-1 dhidi ya FC Saint-Éloi Lupopo katika mchezo wa raundi ya tano ya hatua ya makundi ya TotalEnergies CAF Champions League.

Mchezo huo uliochezwa kwa presha kubwa ulishuhudia wenyeji Lupopo wakianza kwa kasi na kufanikiwa kupata bao la kuongoza mapema dakika ya 19, kupitia kwa Lihozasia, bao lililowapa nguvu mashabiki wao na kuifanya Sundowns kuanza kusaka kusawazisha.

Masandawana hawakukata tamaa, wakiongeza mashambulizi kipindi cha pili na juhudi zao zikazaa matunda dakika ya 55, pale Jayden Adams alipofunga bao la kusawazisha na kurejesha matumaini kwa mabingwa hao wa Afrika Kusini.

Baada ya bao hilo, timu zote zilijaribu kusaka ushindi, lakini safu za ulinzi zilikuwa imara na kufanya dakika za mwisho kumalizika bila mabadiliko ya matokeo.

Sare hiyo inaifanya Sundowns kuendelea kujikusanyia pointi muhimu katika kundi lao, huku wakijiweka kwenye nafasi nzuri ya kusonga mbele hatua inayofuata ya mashindano hayo makubwa barani Afrika.

Kwa upande wa Lupopo, pointi hiyo ya nyumbani ni matokeo chanya dhidi ya wapinzani wakubwa kama Sundowns, na inaongeza ushindani mkali kuelekea michezo ya mwisho ya makundi.

Sasa macho yote yataelekezwa kwenye mchezo wa mwisho wa kundi, ambao utaamua hatma ya timu hizo katika mbio za kufuzu robo fainali.