Kapombe Ajibu ‘Povu’ La Hans Poppe, Hajafurahishwa Na Kauli Zilizotolewa

Mara baada ya Mwenyekiti wa Kamati ya Usajili wa Klabu ya Simba, Zacharia Hans Poppe kunukuliwa akimsema beki wa timu yake Shomari Kapombe, kuna jipya limeibuka.

Hans Poppe alinukuliwa akisema kuwa Kapombe anatakiwa kuchagua kucheza au kuondoka klabuni hapo kwa kuwa hawatamvumilia kuendelea kukaa nje huku akilipwa na akiwa hachezi kwa kigezo cha kuwa majeruhi.

Kapombe alipoulizwa juu ya suala hilo, ameonyesha kukasirishwa na kilichotokea na kusema ni vema na yeye angetafutwa kuulizwa kuliko kumpa nafasi kiongozi wake bila kumsikiliza yeye.


Mbali na hapo Kapombe amesisitiza kuwa hawezi kuzungumza kitu chochote kwa kuwa kilichotokea hajakifurahia lakini zaidi anawaachia wanaomsimamia ndiyo watakaotoa majibu juu ya majaaliwa yake.

Ikumbukwe kuwa tangu arejee Simba mwanzoni mwa msimu huu akitokea Azam FC, Kapombe ameshindwa kuitumikia timu yake hiyo kutokana na kuwa majeruhi kwa muda mrefu jambo ambalo Hans Poppe anaona halimfurahisi kuendelea kumlipa huku akiwa nje ya uwanja.