Wazee wamkaanga Lulu mahakamani, atoka nduki

MAHAKAMA Kuu Tan­zania Kanda ya Dar es Salaam inatarajia kutoa hukumu ya kesi ya kuua bila kukusudia inayom­kabili muigizaji Elizabeth Michael ‘Lulu’ mnamo Novemba 13, mwaka huu baada ya Wazee wa Baraza kutoa maoni yao katika kesi hiyo.

Kesi inayosikilizwa na Jaji Sam Ruman­yika ambapo jana Alhamisi alitoa nafasi ya wazee watatu wa Baraza la Mahakama hiyo kutoa ushauri wao mbele ya mahakama ambapo wote walisema kuwa msanii huyo ameua bila kukusu­dia.

Jaji Ru­manyika al­isema kuwa ushahidi wa upande wa mashitaka umejikita zaidi kwenye mazingira kwa kuwa Lulu ndiye mtu wa mwisho kuwa na marehemu Kanumba.

Akitoa maoni yake, mzee wa kwanza wa baraza hilo, alisema kuwa Lulu ameua bila kukusu­dia kutokana na ushahidi wa mdogo wake Kanumba (Seth) ambaye alielezea ugomvi uli­otokea kati ya watu hao wawili.

“Maoni yangu naona mare­hemu alikufa kutokana na kuteleza maana ilikuwa ni usiku na kulikuwa na giza ingawa sababu ya kutekeleza kwake ni ugomvi wake na Lulu,” alisema.

Kwa upande wa mzee wa pili alisema kuwa Kanumba alikufa kutokana na ugo­mvi na ush­ahidi umewaeleza kulikuwa na giza hivyo anaamini msanii huyo hakuua kwa makusudi bali ilikuwa bila kukusudia.

Hata hivyo, mzee wa tatu, Rajabu Mlawa, yeye alisema kuwa hakuna ubishi kuwa msanii huyo ana kosa la kuua bila kukusudia kutokana na Kanumba kuwa na mwili mkubwa huku akiwa ame­lewa hali iliyosababisha Lulu kutumia nguvu kujiokoa kwa kumsukuma Kanumba na kudondoka chini.

Kufuatia wazee hao kutoa maoni yao, Jaji Rumanyika al­isema kuwa anatarajia kutoa hukumu ya kesi hiyo No­vemba 13, mwaka huu mbele ya mahakama hiyo lakini kwa upande wa msanii huyo alitoka akiwa anatembea kwa kasi kubwa akiwa amejifunga ‘ninja’ usoni pamoja na kuji­funika khanga kwa lengo la kukwepa kamera za waandi­shi huku akikingwa na watu wanne.