NAPE AZUA UTATA CCM...kwa namna yoyote ile, CCM itarudi Ikulu hata kama ni kwa bao la mkono

 Katibu wa Itikati na Uenezi wa CCM, Nape Nnauye.

“...kwa namna yoyote ile, CCM itarudi Ikulu hata kama ni kwa bao la mkono...” kauli hiyo aliyoitoa Katibu wa Itikati na Uenezi, Nape Nnauye hivi karibuni, imezua utata mkubwa kwa baadhi ya wanachama wa chama hicho wakidai wameshindwa kung’amua kama alikuwa akikimaanisha Oktoba 25,  wataingia Ikulu kwa kuiba kura au la.

Nape akilakiwa na wanachama wa CCM.

Nape (pichani) alitoa kauli hiyo Juni 23, mwaka huu katika Viwanja vya Nyehunge wilayani Sengerema, Mwanza alipokuwa akihutubia wananchi kwenye mkutano wa hadhara.

Wakizungumza na gazeti hili kwa sharti la kutotaja majinia yao, wakazi mbalimbali wa Jiji la Dar ambao ni wafausi wa CCM, walitoa maoni yao kuhusu kauli hiyo ambapo wengine walionesha kutokubaliana nayo huku wengine wakidai wanaiunga mkono kwani kiongozi huyo hakumaanisha watashinda kwa kuiba kura.

“Kwa kweli amenistaajabisha sana aliposema tutashinda kwa bao la mkono. Hii inaashiria kuna hujuma huwa inafanyika ili CCM ipate ushindi,” alisema mpiga kura mmoja, mkazi wa Tandale jijini Dar.

“Tunashindwa kumuelewa, kiongozi kama yeye inakuwaje anasema watashinda kwa bao la mkono? Anamaanisha kwamba CCM itashinda kwa njia ambazo si halali?” alihoji Ahmed Zuber mkazi wa Kimara-Baruti, Dar huku mkazi mwingine wa Mwenge aliyejitambulisha kwa jina moja la Salehe akiteteta:

“Nape hakuwa na maana mbaya, alimaanisha CCM ina mtaji mkubwa wa watu katika maeneo ambayo vyama vingine havina na mbinu za ushindi zipo nyingi lakini si wizi.”

Ili kuondoa utata huo, mwanahabari wetu alimpigia simu Nape alipopatikana, alifafanua:

“Mimi nashangaa sijui huu utata unatoka wapi? Video ya mkutano ule imejieleza wazi tena tumeisambaza mitandaoni ili wananchi wenyewe waone nilichoongea na kilichoandikwa gazetini (siyo ya Global Publishers).

“Kamwe CCM haiwezi kushinda kwa kuiba kura. Ingekuwa inaweza kufanya hivyo si ingekuwa inakwenda kuiba Pemba? Mbona haifanyi hivyo?” alisema Nape.

CHANZO: GAZETI LA AMANI