GUINEA YAICHAPA UGANDA YA MICHO MABAO 2-0 NA KUFUZU AFCON

Timu ya taifa ya Guinea imefuzu kucheza Kombe la Mataifa Afrika baada ya kuifunga Uganda mabao 2-0, leo.

Uganda ‘The Cranes’ inayonolewa na Kocha Sredojevic Milutin 'Micho' ikiwa ugenini, imeshindwa kuonyesha cheche kama mechi iliyopita kwa kukubali kipigo hicho dhidi ya vijana wa kocha Michel Dussuyer.

Ushindi huo dhidi ya Uganda iliyokuwa na matumaini makubwa, Guinea imefikisha pointi 10 na kufuzu nyuma ya Ghana yenye 11.

Guinea ilipata mabao yake kila kipindi, la kwanza likifungwa kwa mkwaju wa adhabu ndogo na la pili mkwaju wa penalti katika kipindi cha pili baada ya beki kisiki na nahodha wa Uganda, Andy Mwesigwa kufanya madhambi na kulambwa kadi nyekundu.